أولياء أمور أولى وثانيه ثانوي

:رسالة لأولياء أمور أولى وثانيه ثانوي قبل ما تكون للطلبة

رجاء قبل ما ابنك ينزل يمتحن على التابلت إتأكد من الآتي

 أنه شحن التابلت بنسبة 100%

إتاكد أنه منزل تحديث منصه الامتحان swiftAssess  بأخر رقم الإصدار v1.5.28

إن تم تحديث التابلت نفسه لآخر نسخه تحديث من خلال الضبط

إتأكد أنه واخده معاه في الشنطه

أتأكد أنه محاولش يفتح ثغرات على التابلت لأن التابلت مراقب ومتوصل بشبكه المدرسه ومسؤول التطوير شايف كل تحركات ابنك على الجهاز  وهيتعمل لابنك محضر غش فورا وحرمان سنتين من الامتحان

غير مطلوب منه شحن الشريحه أو استخدامها لأن الامتحان على شبكه المدرسة فقط والمدارس المجهزة بالشبكات

كل ده لازم تتأكد منه علشان متندمش وتعيط بعد كده وتقولي ابني رجع ومعرفش يمتحن أو السيستم مش شغال أو الشبكه واقعه أو اتعمل له محضر غش

واخيرا عدم اصطحاب الموبايل مع الطلاب نهائيا حسب تعليمات الوزير ومن يخالف التعليمات سيعرض نفسه لتطبيق لائحه الانضباط المدرسي عليه

دي نصيحه من أم

لأن النهارده عرفت أن في طلاب في سنة أولى ولا مره دخلوا التدريب

مع أن مدارسهم مجهزه بالشبكات ومشيوا امس قبل الامتحان التجريبي وقالوا ورانا درس وفي منهم  مكسلين ياخدوا التابلت للمدرسة  علشان خايفين يتسرق ومحتفظين به في الدولاب

وفي منهم  معملوش تحديث ولا عارفين بيتعمل ازاي علشان مش متابعين التعليمات بحجه مش عندهم نت في البيت

 وفي منهم التابلت فصل في اللجنه لان الشحن أقل من 25٪ ومعروف أن تابلت الثانوي لازم يكون الشحن مش اقل من ١٠٠٪ علشان تكون مطمئن وانت بتمتحن

وفي منهم اللي فتح ثغرات ووصل به أنها خرجته من النظام مش مجرد ثغره عاديه وبالتالي خايف يروح لمسؤول التطوير يقوله يعمل ايه ..

أنا رسالتي للأمهات📢

ارجوكي افتحي التابلت قبل الامتحان وشوفي التابلت جاهز ولا لأ اعتبريه مسؤوليتك طالما في طلاب مكبرين دماغهم ومش عارفين مصلحتهم  ولو في مشكله تواصلوا مع مسؤول التطوير في المدرسه

ولو حصل اي مشكله وقت الامتحان خارج عن إرادة الطالب بعد كده سواء في الشبكات أو نظام الامتحان يبقى انتوا عملتوا اللي عليكم ومقصرتوش

ربنا معاهم ويوفقهم ويطمنا عليهم ويفرحنا بنجاحهم اللهم امين